BACOLOD CITY – Ginduso na sa Konseho sang siudad sang Bacolod ang isa ka ordinansa nga magahatag sang ngalan sa tanan nga mga dalanon sa siudad kag amo man sa pagbutang sang traffic signs.
Sa ik- 27 nga regular session sang Sangguniang Panlungsod Bacolod, ginduso ni Councilor Renecito Novero ang hagna nga “Street Naming & Traffic Signage Ordinance” para mahapos nga makilala ang mga dalanon sa siudad.
Sa interview sang Radyo Bandera kay Councilor Novero, iya ginpahayag nga sa naganami nga ekonomiya sa Bacolod, nagadamo man ang mga turista nga nagabisita kag kinahanglan mangin mahapos nga matultulan ang lugar nga pagakadtuan.
Suno pa kay Novero, isa man ini sa international requirements sang kada lugar sa bilog nga kalibotan para mangin madasig ang transportasyon.
Ginpaathag man sang konsehal nga para indi maguba ang traffic signage, dapat halongan ini sang pumuluyo kag dapat ara man ang barangay sa pag-maintain sang mga proyekto sang siudad agud maglawig ini.
Ang nasambit nga programa ang may pondo nga P1.5 milyones kag sa ginpasar nga hagna, magadugang ang siudad sang P5 milyones para sa pagpatigayon sini sa bilog nga Bacolod kag agud makita gid ang traffic signage.
