Ginpahayag ni Bacolod City Police Office Director Police Colonel Thomas Joseph Martir nga indi na kinahanglan magtukod sang Special Investigation Task Group (SITG) nga magatutok sa kaso nga pagpatay kay Jeffrey Espeleta Sy Keng Seng.
Suno kay Col. Martir, indi kwalipikado ang kaso sang biktima para sa SITG bangud wala man ini sang gina-uyatan nga sensitibo nga position.
“Indi man kinahanglan SITG a, kay we will be conducting thorough investigation on the incident naman,” pahayag ni Col. Martir.
Dugang pa sang City Director, ginahimo nila ang tanan agud mahatagan sang kasolbaran ang insidente kag iban pa nga mga kaso sang pagpamatay sa syudad.
Ginsiling man sini nga indi niya mapasalig nga indi na ini masulit pa bangud indi man sila ‘superman’ nga mapunggan ini tanan, apang ginpasalig sini nga ila ginatinguhaan nga mabantayan ang syudad apisar magamay ang ila personnel kag patrol capability.
“Ginatinguhaan na namon, ma’am, nga masecure naton sa amon diutay nga strength, sa amon diutay nga mga patrol capability, tinguhaan namon nga indi na gid na masulit,” dugang pa sang City Director.
Ginapasalig man ni Col. Martir sa mga Bacolodnon nga indi lang magkahadlok apisar sang serye sang pinatyanay sa syudad bangud amat-amat nila ini nga solbaron.
