BAGO CITY – Gin-alegar nga liwat nga ginhold-up ang pahenante sang sigarilyo sang pareho man nga mga suspetsado nga una nangbiktima sa ila.
Sin nga tion, nakuha ang balor Php25,000 nga kwarta sang 46-anyos nga biktima sa Purok Paraiso 1, Brgy. Taloc, Bago City, takna las-8:50 sang aga kahapon, Setyembre 17.
Madumduman nga sang tinalikdan nga Hunyo, ang nasambit nga biktima ang nakuhaan sang pareho nga mga suspetsado sang kapin Php60,000 nga balor sang kwarta sa Purok Kanla-on, Brgy. Don Jorge Araneta sa pareho nga syudad.
Suno kay PMSg Mars Anthony Luto, madul-ong kuntani sang sigarilyo ang pahenante kaupod ang iya drayber sa isa ka tyangge sang hinali nga nagdulog ang duha ka armado nga mga suspetsado sakay sang itom nga Rusi motorcycle kag gintayaan sila sang pusil.
Pareho nga naka suksok sang itom nga long sleeve kag long pants ang mga suspetsado kag wala sang plate number ang ila gingamit nga motor.
Naka-helmet ang drayber sang motor samtang nakasuksok sang kalo naman ang back-rider.
Positibo nga ginkilala sang biktima ang isa sa mga suspek paagi sa Rogues’ Gallery.*
