Bacolod City – Nagasinggitan sang hustisya kag bulig ang mga himata sang Overseas Filipino Worker (OFW) nga si Leonora Balalilhe-Brillantes, 33-anyos kag residente sang Brgy. Tinampa-an, Cadiz City, Negros Occidental nga gin-alegar napatay sa kamot sang iya pintas nga amo sa Kingdom of Saudi Arabia.
Suno sa bana sini nga si Rohel Brillantes, Pebrero sini nga tuig sang ulihi sila nakabaton sang tawag gikan kay Leonora.
Sa ila ulihi nga pag-istoryahanay, nagapamangkot si Leonora kun nabaton sang mga ini ang sweldo nga iya ginpadala pinaagi sa iya nga amo.
Apang wala sila may nabaton nga kwarta kag didto gin-usisa ni Leonora ang iya mga amo.
Dugang pa ni Rohel, nabalitaan nalang sang ila pamilya nga gina-maltrato na sa Saudi ang iya asawa.
Nakapalagyo si Leonora sa iya gina-obrahan kag nagpalapit sa talatapan sang Overseas Workers Welfare Administration (OWWA) kag didto nahibaluan nga may malain na ini nga ginabatyag sa lawas.
Suno naman sa iban nga OFW didto, nagapalanuka na ini kag nagalain na ang pamatyag.
Nagapati ang pamilya ni Leonora nga bangud ini sa ginhimo sang iya mga amo.
Sini gid lamang nga Martes, Hulyo 26, nasapwan si Leonora nga wala na sang kabuhi.
Luyag sang iya mga himata nga mapauli balik sa pungsod ang bangkay sini kag mahatagan sang nagakaigo nga hustisya ang iya kamatayon. Madumduman nga nagpasimpalad si Leonora sa Saudi sadtong Disyembre 27, 2021 para mahatagan sang maayo nga bwas damlag ang tatlo sini ka mga kabataan nga naga-edad 11, 9, kag 3-anyos pa lamang.
