Wednesday, February 8, 2023

Panaad Park and Sports Complex Ginahanda na Para sa “Masskara sa Panaad” sa Bulan sang Oktubre

- Advertisement -
Panaad Park and Sports Complex in Bacolod City

BACOLOD CITY – Ginpahayag ni Negros Occidental Provincial Administrator Atty. Rayfrando Diaz II nga nakipagsapol ini kay Bacolod Mayor Alfredo “Albee” Benitez sadtong tinalikdan nga Biyernes, Agosto 12 para sa posible nga kolaborasyon sang tunga sa siyudad kag probinsya sa palaabuton nga MassKara Festival sa maabot nga Oktubre sini nga tuig.

Kabahin man sa nasambit nga pagsinapol sanday Provincial Tourism Officer Cheryl Decena kag mga opisyales sang Association of Negros Producers (ANP).

Suno kay Atty. Diaz nagsulat si Mayor Albee kay Governor Eugenio Bong Lacson kun mahimo nga ihanda ang Panaad Stadium sa pagbukas sang MassKara Festival nga magasugod sa palaabuton nga Oktubre 1 kag magalawig tubtob Oktubre 22.

- Advertisement -

Dugang pa ni Diaz, luyag ni Benitez nga paga usaron ang Panaad Sports Park and Stadium nga nahamtang sa Barangay Alijis, siyudad sang Bacolod.

Pahayag pa ni Diaz, gilayon nga nagapatigayon sang “Repair kag Renovation” ang provincial government sa nasambit nga pasilidad agud mangin preparado ini antis pa mag-umpisa ang MassKara Festival.

Suno kay Diaz ginatun-an man karon sang probinsya ang posible nga pag usar sang stadium kalakip na ang mga booth sang mga nagkalain-lain nga mga Local Government Units (LGU) bilang venue para sa Expo kadungan sang tinuig nga festival.

Gina-hambalan man sa nasambit nga meeting ang palaabuton nga mga programa nga pagabuylogan sang probinsya sang Negros Occidental kag siyudad sang Bacolod.

Madumdoman nga duha ka tuig nga wala makahiwat sang MassKara Festival bangud sa pandemic nga Covid-19.

Nagalaum naman si Diaz nga magasuporta ang tanan nga mga alkalde bangud ang Presidente sang Association of Chief Executive amo ang anak ni Mayor Albee nga si Mayor Javier Miguel “Javi” Benitez sang Victorias City.

Kun madayon, ini ang pinakauna nga higayon nga pagapatigayunon ang mga event sang MassKara Festival sa Panaad Park and Stadium.*

- Advertisement -

Related Articles

Leave a Reply

Stay Connected

- Advertisement -

Latest Articles