Panday nakuryente-patay sa Binalbagan

Patay na sang nasapwan ang isa ka 56-anyos nga panday sa iya balay sa Sitio Bobo, Brgy. Canmoros, sa banwa sang Binalbagan takna las dyis sang aga sang Martes, Setyembre 6.

Ginkilala ang biktima nga si Ramonito Francisco, 56-anyos nga panday kag residente sang nasambit nga lugar.

Suno sa Binalbagan Municipal Police Station, las onse y media sang aga sila nakabaton sang impormasyon nga nasapwan ang lawas sang biktima sang iya hibablos.

Base sa imbestigasyon sang kapulisan, nasapwan ang biktima nga may ginakaptan nga extension cord.

Sa pagpang-usisa sang personnel sang Disaster Risk Reduction and Management Office (DRRMO), nakumpirmar nga patay na kag ginapatihan nakuryente ang biktima.