Ginserbe ang mandamiento de aresto sa isa ka pari nga akusado sa kaso nga pagpanghimulos sa syudad sang Sagay, Negros Occidental.
Gindakup sang Warrant Section sang Sagay City Police Station ang 62-anyos nga pari sa may bahin sang Meadows of Camelot Subdivision, Barangay Estefania Bacolod City, takna las 6:05 sang gab-i, Lunes, Marso 27, 2023.
Ginkilala ang akusado kay Conrado Mantac, alyas Father Con, isa ka Catholic priest, 62-anyos, residente sang Barangay Balatocan, banwa sang Looc, probinsya sang Romblon.
Si Mantac ang gindakup pinaagi sa mandamiento de aresto may angut sa kaso nga “Rape”, nga gin-isyu kag ginlagdaan ni Judge Reginald M. Fuentebella sang Regional Trial Court, Branch 73 sa syudad sang Sagay
No bail ukon wala sang piyansa ang kaso ni Father Con.
Nahibaluan nga ang kaso ni Mantac ang may kaangtanan sa reklamo nga panghimulos batok sa iya, nga ginpasaka sang isa ka menor de edad nga gin alegar iya gin himuslan sadtong Marso 2022.
Isa anay ka pari si Mantac nga naka assign sa isa ka barangay sa Sagay.
Sa karon yara na sa kustodiya sang kapulisan ang akusado para atubangon ang kaso nga ginpasaka sa iya.*
