Gina-imbitar sang Bacolod Emergency Operations Center ang mga nagatrabaho bilang “clowns” nga mag-volunteer nga magpasadya kag maglingaw sang mga kabataan para sa pagbukas sang vaccination sa mga naga edad 5-11 anyos nga patigayunon sa Riverside Medical Center sa Lunes, Pebrero 14.
Ini ang suno sa pahayag ni Doctor Edwin Miraflor, officer-in-charge sang Bacolod City Health Office sa pag-umpisa sang vaccination rollout sa nasambit nga age group.
Dugang pa ni Miraflor, sa Miyerkules nga adlaw Pebrero 9 natalana nga maga-abot ang COVID-19 vaccine nga Pfizer sa Bacolod.
Handa naman ang EOC Bacolod sa pag-rollout sang mga bakuna sa mga naga edad 5-11 anyos.
Kinahanglan lamang nga magdala sang birth certificate ang mga kabataan upod ang ila mga ginikanan para mabakunahan sang COVID-19, suno kay Miraflor.*
by Aileen Pedreso