Patay ang magulang matapos ginlabu sang iya mismo nga manghod sa Brgy. Magsaysay sa banwas sang Culasi Antique mga takna alas 10:30 sang gab-I, Hulyo 29, 2020.
Sa exclusive interview sang Radyo Bandera Antique kay Police Captain Bryan Alamo, hepe sang Culasi iya sini ginhambal ang ila nga imbestigasyon.
Suno kay Alamo nga nag-umpisa ang tanan sa wala pagpahanugot sang magulang sa lalaki nga nagapangaluyag sa ila manghod nga babaye, rason sang magulang nga ginkilala kay Alex Ayon 49-anyos, nga indi pwedi nga magdayunay ang iya sini manghod kag ang lalaki nga nagapangaluyag sa ila nga manghod bangod malapit lang ini sa pamilya ukon pariente.
Sa piyak nga bahin agud malikaw sa gamo ang lalaki nga nagapangaluyag sa ila nga manghod ginpalikaw na lang ini kag ginpapuli.
Bangod lunsay nakainom ang biktima nga magulang nga si Alex, kag ang iya sini manghod nga lalaki nga ginkilala kay Robert Ayon, 36-anyos, nagbaisay ang duha matapos hambalon ni Robert kay Alex nga wala man sang problema kung mangaluyag ang amo nga lalaki sa ila manghod nga babaye.
Tungod sa wala pag-intindihanay kag tuga sang makahulubog nga ilimnon nag-away ang duha asta naglab-ot sap unto nga nalabu sa ulo sang manghod ang iya sini magulang nga gintunaan gilayon sang iya sini nga kamatayon.
Samtang suno kay Capt. Alamo nga nagapanindugan ang suspek nga depensa lang sa iya sini nga kaugalingon ang natabo kon sa diin ang magulang sini ang una nga naglabu sa iya.
Nakaagum naman sang pilas sa kamot kag kahig ang manghod matapos nga likawan ang paglabu sang iya magulang suno sa suspek.
Nakatalan naman nga pasakaan sang kaso suno sa mga kapulisan ang biktima apisar sang iya nga depensa.
