Nagapangasubo ang pamilya Liansing sa gindangatan ni Patrolman Val Liansing matapos aksidente nga natiruhan ang kaugalingon samtang ginatinluan ang iya nga pusil.
Ang pamilya Liansing nga gikan sa Home for the Blind sa Barangay Mansilingan, syudad sang Bacolod ang may yara sang kasablagan sa lawas ukon person with disabilities (PWDs) kun sa diin lima sa pito ka miyembro sang ila pamilya amo ang bulag.
Si Val kag ang iya isa ka utod ang indi bulag sa ila nga pamilya. Ang iya iloy isa ka half-blind samtang ang iya ikaduha nga amay, magulang kag duha pa ka manghod ang indi makakita.
Indi nangin mahapos ang kabuhi ni Val bangud naghimakas ini nga maka-eskwela apisar nga magamay lang ang sweldo sang iya mga ginikanan nga mga massage therapist.
Ginsulod ni Val ang tanan nga trabaho agud mabuligan ang iya pamilya kag masuportahan man ang iya nga pag-eskwela.
Agud makakuha sang dugang nga income, nagsagod si Val sang 10 ka pispis nga pugo kag ginabaligya niya ang kada itlog sini sa balor nga P2.
Tuman man ang pagpasalamat ni Val sang nangin scholar ini sa 4ps program kag bangud diri nag-gradwar siya sa Kolehiyo nga may kurso nga BS in Agriculture sadtong tuig 2019.
Matapos mag-eskwela, nagpangita si Val sang trabaho kag sa luyag sini nga mangin pulis, nagkuha siya sang eksaminasyon sa National Police Commission (NAPOLCOM).
Sang tuig 2021, nakapasar si Val kag nagpaidalum ini sa pila ka bulan nga paghanas tubtob tigayon nga nangin Patrolman.
Madumduman man sang Septyembre 28, 2022 nagdaug ang iya pamilya sa ‘National Search for 2022 Salaysay ng Buhay ng Pamilyang Pantawid’ sa kategorya nga Mata sang Batang 4Ps.
Apang, sini nga adlaw sang Domingo, Oktubre 30, 2022 ginbawian si Val sang kabuhi matapos aksidente nga matiruhan ang kaugalingon samtang ginatinluan ang iya pusil sa iya nga balay sa Purok Punay, Barangay Mansilingan.
Rest in Peace, Patrolman Val Liansing.
via Israel Salanga/DSWD 6
