NEGROS OCCIDENTAL– Isa ka iloy ang nagdangop sa Radyo Bandera Bacolod agud i-reklamo ang natabo sa iya 30-anyos nga bata sa gin-alegar gin-kastigo sang duha ka mga jail guards sang Bureau of Jail Management and Penology (BJMP) sa siudad sang Talisay, Negros Occidental.
Duha na ka tuig nga nakahunong si Mark Salbebia matapos nga gindakup bangud sa gin-alegar pagpatay sa isa ka residente sang Barangay Dos Hermanas sa siudad sang Talisay sadtong tuig 2021.
Nagapati ang iloy ni Salbebia nga inosente ang iya anak sa krimen rason nga nagsungka si Salbebia sa team leader sang substation sang pulis nga naka-base sa Concepcion Talisay City.
Dugang pa sang iloy, mabuot nga bata si Salbebia bangud nagabulig ini sa iya ginikanan.
Nagabaligya si Salbebia sa sulod sang BJMP sang mga dulsi, biskwit kag iban pa agud makabulig sa ila panimalay.
Suno sa alegasyon, nagabaligya ini sang sigarilyo sa sulod sang BJMP rason sang kaakig sang jail guard tubtub gin-kastigo ini.
Kaupod sang iloy ni Salbebia ang Purok Chairwoman sa JJ Gonzaga, Brgy. Mansilingan ang nagdangop sa Radyo Bandera Bacolod agud magpangayo sang bulig, matapos nga indi sila pagtaga-an sang ligwa nga makasulod kag makita ang sitwasyon sang PDL sa sulod sang BJMP sa Talisay City.
Gin-tinguhaan naman sang Radyo Bandera Bacolod nga padulongan ang BJMP sa Talisay City apang wala ini sila ginpasulod kag indi available ang jail warden sa iya opisina.*
