Nabawian sang kabuhi ang pito tanan ka mga indibidwal sa ginpatigayon nga operasyon sang kapulisan batuk sa ginakabig kriminal okon most wanted nga mga persona sa probinsya sang Maguindanao.
Ginpatigayon ang police operation, pasado las 4:00 sang kaagahon, miyerkules sa Barangay Mileb, banwa sang Rajah Buayan, sa diin nabawian sang kabuhi sanday Torque Utto Latip kag Katindig Mustapha.
Wala na ginhingadlan sang kapulisan, ang lima pa ka mga indibidwal nga napatay man sa nasambit nga operasyon kag gina alegar kaupod sang duha ka mga “most wanted persons”.
Kalakip sa mga kaso nga ginapangatubang ni Latip kag Mustapha amo ang frustrated murder kag robbery with homicide.
Gintumod man sang kapulisan nga kabahin si Latip sang isa ka grupo sang mga kriminal sa probinsya sang Maguindanao.
Nakuha naman sa posesyon sang nasambit nga mga kriminal ang walo ka mga matag-as nga kalibre sang armas luthang kag mga bala.
Samtang, isa naman ka pulis ang napilisan sa ginpatigayon nga operasyon.*
