Ginpahayag ni Police Station 2 commander Police Major Paul Vincent Pendon nga may yara na sila sang “person of interest” sa pagluthang-patay kay Mark Decolongon sa Palanca Road, Brgy.8 sa syudad sang Bacolod, tinalikdan nga Hunyo 28.
Apang suno sa hepe, indi pa handa ang ila nakuha nga witness nga maghatag sang statement natuhoy sa natabo.
Dugang pa sini, ila anay nga ginhatagan sang tion ang saksi subong man ang pamilya sang biktima.
Madumduman nga samtang nagapangkalkal sang basura si Decolongon sa lugar sang insidente, ginluthang ini sang suspetsado nga nagasakay sa motorsiklo nga gintunaan sang iya kamatayon.
Ang biktima ang ginareklamo nga kawatan sa Reclamation Area subong man sa Brgy. 2 kag Brgy. 8.
Sa karon, nagapadayon pa ang imbestigasyon sang kapulisan sa natabo.*
