BACOLOD CITY – Aminado si Bacolod Police Station 6 Commander Police Captain Dax Santillan nga nabudlayan sila sa pagsolbar sang kaso nga pagpatay kay Joesery Jaranilla sa Mercury St., Puentebella Subdivision, Brgy. Taculing, Bacolod City sang tinalikdan nga Enero 10 sang gab-i.
Suno sa hepe, tubtob karon wala pa sila sang nakuha nga testigo sa lugar nga makabulig sa ila imbestigasyon kag indi man klaro ang ila nakuha nga CCTV footage bangud nasilakan ini sang suga.
Apang nagalaum si PCAPT Santillan nga sa dalayon, ila matumod ang mga suspetsado nga nagluthang sa biktima.
Madumduman nga ginluthang sang makapila ka bes si Jaranilla samtang papauli ini sa ila balay gikan sa trabaho.
Ginpahayag nga nakaangkon ini sang 23 ka igo sang bala sa lawas nga gintunaan sang iya kamatayon.
Sa karon, ginatutukan sang kapulisan ang anggulo nga may kaangtanan ini sa iya trabaho bilang security guard subong man ang personal sini nga away.
