BACOLOD CITY – Nagpahibalo ang Department of Social Welfare and Development sa Region 6 nga ang pondo para sa Assistance to Individuals in Crisis Situations (AICS) Educational Assistance ang ubos na.
“Ginapahibalo sang DSWD Field Office VI nga WALA sang pagahiwaton nga payout para sa Educational Assistance sa masunod nga duha ka Sabado, September 17, 2022 kag September 24, 2022 tungod naubos na ang pondo nga gindagdag sang DSWD Central Office,” suno sa DSWD Western Visayas.
Base sa pinakaulihi nga datos, naglab-ot na sa 36,131 ka mga estudyante ang nahatagan sang Educational Assistance nga sumatotal nagabalor P101, 326,000.
Suno sa DSWD-6, luyag man nila nga magpadayon sa pagpanagtag apang wala na sang pondo nga nabilin para sa nasambit nga educational assistance.
Nagpadala na ang DSWD-6 sang proposal para sa dugang nga pondo halin sa DSWD Central Office apang tubtob subong, suno sa ila, wala pa sang may ginhatag nga dugang nga pondo.*
