ROME– Ginkumpirmar sang Vatican nga may respiratory infection ang 86-anyos nga si Pope Francis.
Na-admit si Pope Francis sa isa ka ospital sa Rome.
Pila ka adlaw ang nagligad sang naga-reklamo ang Santo Papa nga nabudlayan ini mag-ginhawa, suno kay Matteo Bruni, Vatican spokesman.
Gilayon gindala ang Santo Papa sa Rome Gemelli Hospital kag didto nahibalu-an nga may respiratory infection ini.
Ginklaro naman ni Bruni nga indi COVID-19 ang balati-an sang Santo Papa.
Si Pope Francis ang yara na sa ika-pulo nga tuig bilang tigpamuno sang simbahang Katoliko.
Madamo sang mga tawo ang nagpadala sang mensahe para sa Santo Papa.
Kanselado naman ang tanan nga appointments ni Pope Francis sumugod subong nga adlaw, Huwebes, Marso 30, 2023.
Madumduman nga naga-wheelchair na lamang si Pope Francis sa mga nagliligad nga bulan bangud naka-agum ini sang chronic knee pain.
Sadtong Hulyo 2021, may balati-an man ini nga diverticulitis ukon paghubag sa linings sang tina-e kag nagtinir sa ospital sang napulo ka adlaw.
Base naman sa interview kay Pope Francis sadtong Enero, 2023, nagbalik ang iya masakit nga diverticulitis.*
