Naggwa sa imbestigasyon sang Bacolod City Police Station 2 nga posible lansihanay sa kwarta ang rason sa pagluthang sa duha ka mga persona sa Prk. Lampirong Brgy.2 kaina sang aga sa diin isa gid diri ang ginbawian sang kabuhi.
Suno kay PLt. Andy Ofalia, deputy Station Commander sang Police Station 2, nadula ang bag sang babaye nga biktima nga may unod nga kwarta.
Ginapahayag nga nag-inom-inom pa ang grupo kagab-i antes matabo ang insidente pasado las-10:00 kaina sang aga. Sa pagsearch sang mga otoridad sa boarding house kun sa diin nagluntad ang insidente, madamo sang foil kag mga usado nga plastic sachet ang ginahaboy sa likod sang balay.
Sa pagpangusisa naman sang Radyo Bandera Patrol sa naga istar sa kaiping nga balay sang boarding house, masami nga magahod ang nasambit nga mga grupo kun gab-i.
Ginapahayag naman nga taga siudad sang Kabankalan ang tag-iya sang boarding house kag ginapadala lamang sa money remittance center ang ila bayad sa renta.
Nakabati naman ang pila ka mga residente sa lugar sang duha ka lupok nga nagikan sa sulod sang nasambit nga boarding house.
Nagpakuno-kuno naman ang daw kaangay lang nga wala sang may natabo ang mga tawo nga yara sa sulod samtang naglakat naman paggwa sa balay ang isa nila ka kaupod kag wala sini namutikan nga ginasundan na siya sang gunman kag paglab-ot sini sa is aka tiyangge didto kag gintiro ini sa ulo nga gintunaan sang iya kamatayon.
Gindugang pa sang iloy nga casual lang nga nagapanglakaton ang gunman kag ginahabyog-habyo pa sini ang iya kamot nga nagabitbit sang àrmas-luthang.
Bangud sa natabo, nagkinaran-karan ang mga tawo sa sulod sang boarding house kag nagasinggitan nga nagapangayo sang bulig nga may isa pa ka babayi ang ginluthang kag pilason nga yara sa sulod.
Ginahulat pa sa karon sang mga otoridad nga mangin istable ang kondisyon ni alias Lorraine nga nga kritikal subong sa hospital agud nga makakuha sang dugang nga impormasyon sa identity sang gunman.
Sa karon padayon pa ang imbestigasyon sang Police Station 2 sa nasambit nga insidente.*
