BACOLOD CITY – Nag-request na sang autopsy examination ang kapulisan sa pamilya sang isa ka commercial sex worker nga nasapwan-patay sa higad sang dalan nga sakop sang Purok Progreso, Barangay Alijis sa syudad sang Bacolod, kaina sang aga, Huwebes, Setyembre 8.
Positibo nga ginkilala ang biktima sang iya live-in partner kag amay sini bilang si Rovily Alcantara Mahinay, 26-anyos, kag residente sang Purok Riverside, Bolinao sa Barangay 1, Bacolod City.
Suno sa live-in partner nga isa ka trisikad driver, naga-obra bilang commercial sex worker si Mahinay sa Goldenfield area.
Suno kay P/Capt. Elmer Bonilla, hepe sang Bacolod Station 7, nag-request na sila sa pamilya para sa autopsy examination agud mapatigayunan sang post mortem ang lawas sang biktima kag mahibaluan ang gintunaan sang iya kamatayon.
WATCH:https://www.facebook.com/SerbisyongRadyoBanderaBacolod/videos/1495827094214556
Sa inisyal nga pag-check sa biktima, may nakit-an nga mga lagub sa liog sini kag pilas sa baba.
Iga-examine pa man ang pribado nga bahin sang lawas ni Mahinay agud mahibaluan man kung may yara sang rape nga natabo ukon wala.
Sandig sa panaysayon sang live-in partner sang biktima, naka-contact pa sa iya si Mahinay kag ang iya sini nga bugaw nga may nag-book na sa iya nga customer takna las 10:30 kagab-i, Miyerkules, Setyembre 7.
Nagsiling ang bugaw sa live-in partner sang biktima nga nagsakay sa auto si Mahinay.
Pila sa mga anggulo nga ginalantaw sang kapulisan amo nga posible nga wala mag-intyendihanay sa presyuhanay, hubog ang suspek, may natabo nga pagpamintaha, kag iban pa.
Matapos sang insidente, ginwigit na lang ang biktima sa dalan.
Sa karon, ginatinguhaan sang kapulisan nga ma-trace ang bugaw kay basi nakilal-an niya man ang customer.
Magapadulong man ang pulis sa lugar kung diin nagatrabaho ang biktima para sa dugang nga imbestigasyon.
Wala sang bata si Mahinay kag ang iya live-in partner.*
