Nagapanguna ang “property dispute” sa mga motibo nga ginalantaw sang kapulisan sa pagpatay sa isa ka businessman sa syudad sang Bacolod, sini lang nga hapon, Martes, Hunyo 14, 2022.
Suno kay P/Lt. Jonito Pastrana, deputy station commander sang Station 1 nga magluwas sa “property dispute,” ginalantaw man ang personal grudge bilang motibo sa insidente
Ginkilala ang biktima kay Jeffrey Keng Seng, 40-anyos, kag residente sang Gatuslao-27th streets sa Barangay 1, syudad sang Bacolod.
Sandig sa imbestigasyon, una nga ginpaarakan sang luthang si Keng Seng, nga sakay sang Nissan patrol nga may plate number XRV 354 sa intersection sang BS Aquino Drive-Lacson Street sa Barangay 5, syudad sang Bacolod.
Nakapadalagan pa sang iya salakyan si Keng Seng tubtob nga ini ang nagdiretso sa kudal nga yara sa corner Gatuslao Street-BS Aquino Drive.
Nagasakay sa wala pa mahibaluan nga salakyan ang duha ka mga suspek.
Suno sa isa ka witness, sang yara na nakabunggo si Keng Seng sa kudal, nanaog pa gid ang isa ka gunman nga nakasuksok sang itom nga jacket kag gintiro liwat ang biktima.
Sa inisyal nga impormasyon, may igo sa kilid ang biktima apang ini ang igapaidalum pa sa autopsy agud nga mahibaluan ang mga pilas nga naagum sang biktima.*
