BACOLOD CITY– Ginkumpirmar ni Police Captain Jonito Pastrana, hepe sang Bacolod City Police Station 2 nga may ginalantaw na sila nga person-of-interest sa nagluthang-patay sa isa ka barker sa Purok Kagaykay, Barangay 2 sa siudad sang Bacolod sadtong tinalikdan nga Sabado de Gloria, Abril 8, 2023.
Sa interview sang Radyo Bandera kay Captain Pastrana, iya ginpahayag nga ginpakadtu-an liwat subong nga aga sang iya mga personnel ang lugar agud makakuha sang dugang nga testimoniya sa mga saksi agud makahatag sang kasanagan sang ila ginapatigayon nga imbestigasyon.
Ginpahayag man ni Pastrana nga may kaangtanan sa iligal nga druga ang ila ginalantaw nga motibo sa pagpang-luthang bangud magluwas nga naka-agi priso ang biktima sa Muntinlupa City bangud naglapas sa Republic Act 9165 ukon Comprehensive Dangerous Drugs Act of 2002 kag yara man ini sa drugs watchlist sang kapulisan.
Suno kay Pastrana, ang biktima ang ginkilala kay Stephen Bachoco III, 32-anyos, isa ka barker, may live-in partner kag residente sang Purok Tahong, Barangay 2.
Dugang pa ni Pastrana nga naka-agi man priso sadto sa BCPS2 si Bachoco angut naman sa paglapas sang Republic Act 10591 ukon Illegal Possession of Firearms and Ammunitions.
Sandig sa imbestigasyon sang kapulisan, may gin meet-up ang biktima nga duha ka persona malapit sa Barangay Hall sang Barangay 2 sang hinali nga nag-abot ang isa ka suspetsado kag gilayon na lamang ginluthang sa ulo si Bachoco.
Suno sa kapulisan, nagtinguha pa kuntani nga makadalagan ang biktima pasulod sa Purok Kagaykay apang ginsundan ini sang suspek kag ginluthang liwat rason sang iya hinali nga kamatayon.
Gilayon naman nga nagdalagan ang suspek pasulod sa eskinita sang Purok Sigay matapos mahimo ang krimen.
Ginalantaw ni Pastrana nga onsehanay sa transaksiyon sa iligal nga druga ang motibo sang kremin kag ginpahayag man sini nga posible nga kakilala lang sang biktima ang suspetsado.*
