Guilty!
Ini ang pamatbat ni Judge Maria Gilda Loja-Pangilinan sa kaso sang isa ka pulis sa Quezon City nga akusado sa paghimulos sa 17 anyos nga babaye.
Nagluntad ang kremin sang tinalikdan nga Enero 2022 kag nadesisyonan ini sang Pebrero 6, tuig 2023.
Naga edad sang 48 anyos ang lalaki nga pulis sang magluntad ang kremin.
Ginpaboran sang korte ang panaysayon sang biktima nga ginpwersa siya sang pulis nga magpakighilawas.
Wala naman ginbaton sang korte ang “alibi” sang suspek nga magkarelasyon sila sang menor de edad.
Isa ka anay miyembro sang Quezon City Police District Crime Laboratory ang suspetsado.
Nagkilalahay ang biktima kag suspek bangud nangin regular nga kustomer sa kalan-an ang pulis nga ginapanag-iyahan sang tiya sang biktima.
Base sa alegasyon, wala makabatu ang minor de edad sang ginhimuslan sang suspek bangud gin-uyatan ang iya duha ka mga kamot samtang ginahimo ang kremin.
Antis ang kremin, nagbisita ang suspek sa puluy-an sang magtiya, apang sang ginhambalan na sang biktima ang suspek nga mag-gwa sa puluy-an, hinali na lamang nga ginbutong sang suspek ang biktima, pasulod sa isa kuarto kag ginhimuslan.
Ginhingadlan ang pulis bilang si Chief M/Sgt. Galahad Altarejos.*
