Murcia, Negros Occidental–Patay ang isa ka pulis kag duha ka sibilyan matapos ang nagluntad nga komosyon sa isa ka resto bar sa Brgy. Salvacion, banwa sang Murcia, Negros Occidental, pasado ala 1:10 sang kaagahon, Biyernes, Marso 31,2023.
Ang napatay nga pulis ginkilala kay Police Corporal Gabby Castillo Y Tamayo kag duha ka sibilyan nga sanday Benedict Maguad y Senosa nga taga Murcia kag Marvin Guardavilla nga taga La Castellana.
Pilason man ang duha ka pulis nga ginkilala sanday PSSG Namelou Sapuan Y Hilado taga Murcia; PSSG Jaytie Misme Y Galentes taga Tabao, Valladolid kag Fernando Diaz taga Murcia nga ginpangdala sa hospital para sa nagakaigo nga pagbulong.
Yara na sa kustodiya sang Murcia MPS ang mga suspek nga ginkilala sanday Marjune Gallano; Jojie Gallano kag Ching Jingco nga nadakpan sa follow-up operation.
Sandig sa inisyal nga imbestigasyon sang Murcia PNP, may nagluntad nga komosyon sa guwa sang ilimnan sa tunga nanday Marjune Gallano kag Marvin Guardavilla kun sa diin, ang mga pulis nga yara sa area ang magatambag lang kuntani apang sila ang nadalahig sa insidente.
Nakaangkon sang mga buno sa lawas sanday Marvin (kilid dughan); PSSG Sapuan (kilid sang ilok); Fernando Diaz (likod); PCPL Castillo (tiyan); Benedict Maguad (wala nga hita kag kamot) kag PSSG Jaytie Misme nga may igo pagid sang bala sang wala matumod nga armas.
Nagpalagyo ang mga suspek matapos ang krimen apang nakadalakpan sa follow-up operation sang kapulisan.
Narekober sa crime scene ang:
1. isa ka glock 17 9mm with serial number; magazine loaded sang 22 live ammunitions sang cal. 9mm nga gin-isyu kay PCPL Gabby Castillo; PNP ID; isa ka sling bag kag brown wallet.
2. isa ka glock 17 9mm with serial number kag may isa ka magazine loaded sang 4 live ammunitions sang cal. 99 nga gin-isyu kay PSSG Jaytie Misme; isa ka holster color black kag 6 ka live ammunitions sang cal. 9mm nga narekober sa salog sang restobar.
Sanday Police Corportal Castillo, PSSG Sapuan kag PSSG Misme ang na-assign sa 2nd NOCPMFC sa Brgy. Dulao, Bago City.
