NEGROS OCCIDENTAL – Dead-on-arrival ang drayber sang motorsiklo sang mabungguan sini ang towbar kag malapakan sang ginaguyod nga truck nga may karga nga tubo sa national highway sang Barangay Blumentritt sa banwa sang Murcia, Negros Occidental sini nga Miyerkules, Setyembre 21, 2022.
Ginkilala ang drayber sang motorsiklo nga napatay kay Andrie Ditching, 21-anyos, residente sang Purok Ipil-Ipil sa Barangay Blumentritt.
Suno sa imbestigasyon, nagabiyahe padulong nakatungdan nga bahin sang highway ang motorsiklo kag ang duha ka Isuzu truck nga may plate number nga GHG 464 kag GER 161 nga pareho nga may karga sang tubo.
Ginamaneho ang duha ka trucking nanday Espiridon Albancis, 58-anyos kag Larry Salanatin, 58-anyos.
Nahibaluan nga nagub-an sang makina ang GER 161 truck rason nga ginguyod ini sang GHG 464 truck pinaagi sa ‘towbar’.
Apang, nag-over take ang motorsiklo sa unhan sang ginaguyod nga trucking.
Wala natalupangdan sang drayber sang motorsiklo nga may towbar sa tunga sang duha ka trucking kag nabunggo ini sa towbar rason nga natumba kag nalapakan ini sang ginaguyod nga trucking.
Naka-angkon sang seryoso nga pilas sa lawas ang drayber sang motorsiklo kag gilayon ini gindala sa Corazon Locsin Motelibano Memorial Regional Hospital apang ginbawian man ini sang kabuhi.
Yara naman sa kustodiya sang Murcia Municipal Police Station ang duha ka drayber sang truck kag posible magapangatubang sang kaso nga reckless imprudence resulting to homicide and damage to property.
