Patay ang isa ka security guard sang University of Negros Occidental-Recoletos (UNO-R) nga pakadto kuntani sa trabaho sa nagluntad nga aksidente sa dalan Circumferential, Brgy. Alijis, sa syudad sang Bacolod pasado las singko sang kaagahon sang Lunes, Agosto 8.
Ginkilala ang biktima nga si Louie Jamon Vergara, 41-anyos nga gwardya sang UNO-R, residente sang Purok Ezekiel sa Brgy. Handumanan, kag amay sang duha ka mga kabataan.
Base sa imbestigasyon, padulong kuntani ang biktima sa trabaho sakay sa iya motorsiklo nga Sniper 150 kag gina-usoy ang Northbound lane nga direksyon sang masangit ini sa may sidewheel sang tricycle nga nag-overtake sa carry van.
Nakuhaan naman sang dash cam sang van ang aksidente kun diin makita nga nagtabog pa ang biktima sa panguna nga bahin sang van matapos ma-side sweep sang tricycle.
Ginkilala ang drayber sang tricycle nga si John Alipoon Dayday, 23-anyos nga soltero kag residente sang Brgy. Pahanocoy, nga magadeliver kuntani sang mga tinapay.
