BACOLOD CITY — Ginpasar na sang Bacolod City Sangguniang Panlungsod ang ordinansa nga magahatag sang maintenance medicines para sa hypertension kag diabetes sa mga pigado nga senior citizens sang syudad.
Sa post sang Bacolod City PIO, ila ginpahayag nga nagatuyo ini nga inisyatibo agud pasanyugon ang ikaayong lawas sang mga tigulang paagi sa paghatag sa ila sang access sa nagakaigo nga bulong.
Gin-aprub sa third and final reading ini nga ordinansa sadtong Abril 12, 2023. Gin-proposed ini ni Councilor Celia Flor, chairperson sang Committee on Senior Citizens and Veteran Affairs, kaupod sanday Councilors Simple Distrito kag Claudio Jesus Raymundo Puentevella bilang co-proponents.
P4 Milyones ang inisyal nga budget nga ginpa-in para sa pagbakal sang nagkalain-lain nga maintenance medicines para sa hypertension kag diabetes.
Sarang maka-avail kag makabenepisyo ang mga pigado nga senior citizens nga residente sang Bacolod sa sulod sang indi magnubo sa anum ka bulan.
Para makakuha sang bulong, kinahanglan nga magpaidalum sa check-up ang mga senior citizens sa isa ka public health practitioners kag dapat may prescription. Pagkatapos sini, kinahanglan nga magpa-enroll sa barangay kag ila na makuha ang mga bulong.
Bangud napa-in na ang budget, suno kay Councilor Flor nga posible mapatuman ang ordinansa sa masunod nga tuig ukon pwede man nga maka-file para sa supplemental budget ang konseho sa katapusan sini nga 2023.*
