KABANKALAN CITY – Boluntaryo nga nagsurender sang Martes sang aga, Setyembre 20, ang suspetsado nga nagbungkal sang bangkay sang 67-anyos nga babayi sa Kabankalan Public Cemetery sang Agosto 29.
Ginkilala ang suspek nga si Nico Jun Alpirez, 24-anyos, wala sang trabaho, kag residente sang Sitio Mohon, Brgy. Binicuil, sa syudad sang Kabankalan.
Base sa pahayag sang suspek, hubog ini sang ginhimo sini ang nasambit nga pagpangbungkal sang pantyon.
Naghapit ang suspek sa patyo agud mangihi apang naglibot-libot pa ini tubtub natukiban sini ang bag-o lamang nalubong nga patay bangud basa pa ang semento.
Ginbungkal sang suspek ang pantyon gamit ang bato kag ginbutong sini ang lungon.
Nahulog ang lungon kag nabuksan ini, rason kun ngaa yara na sa duta ang bangkay sang natukiban sang nag-report nga sepulturero.
Gin-aku sang suspek nga ginkuhaan sini sang bayo ang bangkay kag gingisi sini ang nakaputos nga plastik bangud “luguson” sini kuntani ang bangkay apang wala niya ini gindayon kay tig-a na ang lawas.
Ginklaro man sang suspek nga wala ini sang tuyo nga mangawat kag wala sang alahas sa lulubngan.
Dugang pa sang suspek, indi ini makatulog bangud nakonsensya ini, rason kun ngaa nagsungka ini sa kapulisan.
Ginpabutyag sang supek nga ginahinulsulan sini ang iya ginhimo sang nahibaluan sini nga tigulang na ang bangkay. Dugang pa sang suspek, atubangon sini ang ipasaka nga kaso kag nagapangayo ini sang pasensya sa pamilya sang biktima.
