LA CARLOTA CITY – Ginhapo kag gintakdan pa sang oxygen ang isa ka lalaki matapos madakpan sa ginpatigayon nga buy-bust operation sa dalan JM Basa bangga San Agustin, Brgy. 2 Poblacion, siudad sang La Carlota las 5:45 sang hapon sang Martes, Pebrero 7.
Ginkilala ang suspetsado nga si Romeo Paron, alyas “Jun”, 50-anyos nga tag-iya sang isa ka junk shop kag residente sang nasambit nga lugar.
Base sa report sang La Carlota City Police Station, nakumpiskar sa suspek ang duha ka daku nga sachets kag apat pa ka gamay nga sachets sang ginasuspetsuhan shabu nga nalakipan sang buy-bust item.
Ginabulubanta nagabug-at ang ginasuspetsuhan shabu sang 10 ka gramos kag nagabalor sang P60,800.
Gindala ang suspek sa kustodiya sang nasambit nga police station para sa nagakaigo nga disposisyon.
Nagapang-atubang ang suspek sang kaso nga paglapas sa Republic Act No. 9165 ukon ang Comprehensive Dangerous Drugs Act.
