BACOLOD CITY – Tuman sa gihapon kadamo ang tahong nga nagdagsa sa Sitio Pasil, Barangay Poblacion, San Enrique apisar nga nagbulig na panghakot ang mga kaiping nga banwa kag syudad, Hulyo 13.
Sa interbyu sang Radyo Bandera kay Punong Barangay Zeus Matthew Awacay, iya ginsiling nga tungod sa kadamuon sang tahong, nagpabulig na sila panghakot sa iban nga mga Local Government Unit (LGU) apang padayon sa gihapon ini nagadamo kada adlaw.
Madumduman nga sang tinalikdan nga Lunes, Hulyo 11, ginkalipay sang mga residente sang nasambit nga banwa ang pagdagsa sang tahong sa ila nga baybayon.
“Sa mga pumuluyo, nagapangayo kami sang inyo gamay nga pasensya bangud wala kami nagapabaya nga makuha ang tanan nga tahong. Indi man pwede nga aton lang ina pabay-an,” suno kay Kapitan Awacay.
