Gina-imbestigaran na sang Talisay Police Station ang alegasyon nga pag-abduct sang walo ka armado nga persona sa 22-anyos nga lalaki sa Banga Hiyang Hiyang, Barangay Cabatangan, sa syudad sang Talisay takna las dyis sang aga sadtong Martes, Nobyembre 22.
Madumduman nga ginpwersa ginpasakay sang mga suspetsado ang biktima nga si April Boy Gamayo alyas “Jordan” sa White Mitsubishi Adventure SUV nga salakyan sa nasambit nga syudad kag nakit-an ini sang iya himata nga nagalakat-lakat sa banwa sang Pontevedra.
Suno kay Police Lieutenant Dan Oliver Salazar, Deputy Chief of Police for Administration sang Talisay PNP, nakig-angut na sila sa National Bureau of Investigation kag Criminal Investigation and Detection Group agud mahibaluan ang ‘identity’ sang walo ka mga suspetsado nga nagpakilala bilang katapo sang NBI kag CIDG.
Sa karun, ginahulat pa lamang nila ang mangin pahayag sang NBI kag CIDG angut sa gina-alegar nagluntad nga abduction.
Gindugang pa ni Salazar, ginpatawag nila si Gamayo kag ang mga himata sini nga saksi sa gina-alegar abduction agud ipaidalum sa ‘questioning’ para mahibaluan ang matuod nga natabo antes pagasakaan sang kaso ang mga suspetsado.
Suno pa kay Salazar, samtang wala pa sang pinal nga imbestigasyon, magapabilin ang nasambit nga insidente bilang isa ka alegasyon.*
