BACOLOD CITY– Magahimo karon ang siudad sang Bacolod sang panibag-o nga Task Force nga magatutok sa mga nagabalabag sa dalan agud mahatagan sang solusyon ang problema sa trapiko.
Sa ginpatigayon nga Press Conference kahapon, Lunes, Marso 27 sa Bacolod City Government Center sa pagpanguna ni Bacolod City Mayor Albee Benitez, naistoryahan ang mga kontraktor nga nagakay-o sang dalan nga masami nagabutang sang mga construction materials sa higad sang dalan nga posible pagatunaan sang aksidente.
Suno pa kay Mayor Benitez nga ang isa man sa nahatag problema sang trapiko sa Bacolod amo ang pag-okupa sang mga sidewalk rasun kun ngaa nagalikaw ang mga tawo kag naga-agi na sa dalan nga ginaagyan sang mga salakyan.
Pinaagi sa Task Force nga pagahimoon sang siudad may magamonitor na kada adlaw sa mga nagalapaw sa ila propiedad kag nagalab-ot na sa propiedad sang Gobyerno.
Sa pahayag naman ni Atty. Pacifico Maghari III, City Administrator sang Bacolod wala pa nakapapanaog sang Executive Order ang Alkalde pero ini ang posible nga pagapangunahan sang City Legal Office.*
