Bangud sa wala untat nga pag-ulan, tatlo ka mga barangay sa syudad sang Bacolod ang ginbaha kag madamo sang mga pumuluyo ang nabudlayan sa ila transportasyon padulong sa ulubrahan kag buluthuan.
Sa pahayag ni Dr. Anna Maria Laarni Pornan, tigpamuno sang Disaster Risk Reduction and Management Office (DRRMO) Bacolod, kalabanan sa ginbaha amo ang Sur nga bahin sang Bacolod kun diin 2 ka pamilya ang apektado sang pagbaha sa Barangay Mansilingan; isa ka pamilya sa Barangay Pahanocoy; kag 55 naman ka pamilya sa Barangay Sum-ag.
Sa tatlo ka mga barangay nga naapektuhan sang pagbaha, nagdangat sa 18 -19 inches ang kataason sang tubig-baha sa Manisiling sa JJ Gonzaga Subdivision; 11 inches sa mga purok sa Barangay Sum-ag; kag 10-14 inches naman sa San Jose, Fatima kag Economic Highway.
Suno pa kay Dr. Pornan, nga ang mga naapektuhan sang pagbaha amo ang indi maghalin sa ila nga balay bangud sa ginapatihan nila nga madasig lamang magnubo ang lebel sang tubig-baha.
Ang DRRMO Bacolod karon ang magahatag sang food packs sa tatlo ka mga barangay nga apektado sang pagbaha.
Apisar sang paghulaw ka ulan, padayon sa gihapon ang monitoring sang kada Barangay pinaagi sa ila Barangay DRRMO subong, ilabi na sa mga lugar nga indi malab-ot sang syudad.*
By: Red Salgado
