Ginkustodiya na sang Texas Department of Family and Protective Services ang tatlo ka mga buhi nga mga kabataan kag lunsay mga lalaki, matapos nga gin abandona sang ila iloy.
Nakit-an ang mga kabataan sa isa ka apartment sang tinalikdan nga domingo nga nagapangabuhi kaupod sa tul-an sang ila utod nga ginpatay.
Walo ka tuig pa lamang sang ginpatay ang biktima kag ginbutang sang suspetsado sa isa ka kuarto sang apartment.
Suno sa 15 anyos nga pinakamagulang sa mag-utod, isa na ka tuig humalin sang ginpatay ang iya manghod kag ginbutang ini sa isa ka kuarto kasunod sang iya nga kuarto.
Bangud wala sang nagasagod nga ginikanan, nagasalig lamang ang mag-utod sa ginahatag nga pagkaon sang ila katupad balay.
Ang 15 anyos nga magulang amo man ang naga atipan sa iya mga manghod nga naga edad sang pito kag napulo ka tuig.
Nakit-an man nga malnourished ang duha ka mga kabataan kag nakaangkon sang samad sa ila lawas.
Wala na naga eskwela ang mga kabataan humalin sang tuig 2020.
Samtang, na aresto naman ang iloy sang kabataan nga ginkilala sa kay Gloria Williams, 35 anyos, bangud sa pagsakit sa iya kabataan.
Ginpasakaan naman sang kaso ang partner ni Williams nga
ginkilala sa kay Brian Coulter, 31 anyos, bangud sang pagpatay sa bata.
Nagapati ang kapulisan sa Texas nga wala na naga tiner sa apartment ang ginikanan sang kabataan sa sulod sang pila ka bulan.*
