NEGROS OCCIDENTAL – Arestado ang tatlo ka mga persona matapos madakpan nga gin-alegar naga-pot session samtang naga-patrol ang Silay City Police Station kaupod ang 1st Negros Occidental Provincial Mobile Force Company sa Purok Sunset, Barangay E. Lopez, ciudad sang Silay, Negros Occidental, sadtong Martes, Setyembre 20, takna las 2:15 sang kaagahon.
Ang mga nagkaladakpan ginkilala nga sanday Jonnel Sarmiento, 26-anyos; Lowey-gy Chua, 24-anyos; pareho residente sang Brgy. E Lopez, kag isa ka menor de edad nga babayi, suno sa report sang Negros Occidental Police Provincial Office.
Narekober sa posisyon sang mga suspetsado ang isa ka gamay nga elongated heat-sealed transparent plastic sachet nga naga-unod sang white crystalline substance nga ginapatihan shabu, tatlo ka mga disposable lighters, isa ka improvised tooter, isa ka cellphone kag P104 nga kwarta.
Ang tatlo ka mga nagkaladakpan, lakip na ang narekober nga items ang nahunong karon sa custodial facility sang Silay City Police Station.
Natalana nga pasakaan ang mga nagkaladakpan sang kaso mga paglapas sa Republic Act 9165 ukon ang Comprehensive Dangerous Drugs Act of 2002.*
