Warning: graphic photos and content
CANDONI – Tatlo ka mga bangkay ang nasapwan sa Sitio Buyong, Brgy. Cabia-an, banwa sang Candoni, probinsya sang Negros Occidental las 11:30 sang aga sang Sabado, Pebrero 4.
Nalakip sa mga biktima ang mag-amay nga sanday Edmund Castro, 45-anyos kag ang 10-anyos sini nga bata; lunsay mga residente sang Brgy. Haba sa nasambit nga banwa.
Nasapwan ang bangkay ni Edmund sa humayan kag natukiban nga may mga igo ini sang mga bala sa iya dughan, samtang nasapwan ang iya bata sa may sapa kag may mga labo ini sa ulo kag liog.
Nasapwan man malapit sa sapa ang bangkay ni Analie Emaray, 44-anyos nga residente sang Brgy. Cabia-an, kag may igo ini sang bala sa may kilay.
Suno kay Police Major Ruel Culanag, nahibaluan sa pamilya sang mag-amay nga ila ginapangita sa lugar ang ila karabaw nga tatlo na ka adlaw nga nadula.
Posible nga nakit-an sang mag-amay ang ila karabaw sa paghinupot sang mga suspetsado nga nagresulta sa pag-inaway.
Dugang pa ni PMAJ Culanag, una nga ginpatay ang amay kag posible nga nakadalagan pa ang bata kag didto na ini nalab-ot kag ginlabo sa sapa sang gina-alegar duha ukon tatlo ka mga suspek.
Ginlantaw man ni PMAJ Culanag nga naulamid lamang ang babayi nga biktima nga nakasaksi sa pagpatay sa mag-amay, rason kun ngaa gintiro man ini agud indi makapanugid.
Lima ka lupok ang gina-alegar nga nabatian apang wala pa matumod ang kalibre sang armas-luthang nga gingamit sa nasambit nga krimen.
