TALISAY CITY, NEGROS OCCIDENTAL – Nakilala na ang bangkay nga nasapwan sa Minolwan River sa Brgy. 14, Purok Malipayon, siudad sang Talisay sang Lunes, Marso 20.
Ginkilala ang biktima nga si Isias “Junjun” Jalandoon, 61-anyos nga residente sang Brgy. Zone 12-A sa nasambit nga siudad.
Base sa inisyal nga imbestigasyon sang Talisay City Police Station, naka-inom ang biktima sang makahulubog nga ilimnon sa pagsaulog sang piesta sa Brgy. 14-A sang Domingo, Marso 19.
Gina-alegar nga magatabok kuntani ang biktima sa suba nga may kadalumon nga 15 tubtob 20 feet agud magpauli kuntani sa iya puluy-an sa pihak nga barangay.
Ginalantaw pa sang kapulisan nga posible naigo ang ulo sang biktima sa bato sang mahulog ini sa suba.
Ginkakibot naman sang hinablos sang biktima nga nagbalik ini inom bangud may sakit ini sa atay kag naga-antos sang tuberculosis.
Nasapwan ang nasambit nga bangkay nga naga-utaw utaw sa suba takna las-11 sang aga.
