Nagadamu na ang kaso sang tipdas sa Pilipinas.
Bangud sini, gin anunsyo sang Department of Health (DOH), nga posible magluntad ang “outbreak” sa tuig 2023.
Base sa record sang DOH, 450 ka mga indibidwal sa pungsod ang nakaangkon sang tipdas kag rubella okon German measles, humalin sang Enero tubtub Setyembre sini nga tuig.
Mas mataas ini sang 153 porsyento kumparar sang tuig 2021 nga may yara lamang sang 178 ka mga kaso.
Sini nga tuig, na record ang kalabanan nga kaso sang tipdas sa CALABARZON nga may 70 ka mga nagpositibo.
Ginsundan ini sang Central Visayas nga may 61 ka mga kaso kag National Capital Region (NCR) nga may 47 ka mga kaso.
Una diri, ginpalayag sang World Health Organization (WHO), nga posible magluntad ang “measles outbreak” okon pagdamu sang kaso sang tipdas sa tuig 2023, bangud sang wala mabakunahan nga mga kabataan.
Magkatuhay ang measles okon tipdas kumparar sa Rubella, apisar nga halos pareho ang ila sintoma.
Magkatuhay man ang klase sang virus nga gintunaan sini nga mga balatian.
Base sa eksplinasyon sang Mayo Clinic, mas makalalaton ang tipdas okon measles kumparar sa Rubella.
Apang, pareho lamang ang klase sang bakuna nga ginagamit batuk sa duha ka klase sang viral infection.
