Arestado ang isa ka anay priso sa ginpatigayon nga buy-bust operation sa Purok Sunflower, Brgy. Poblacion, sa syudad sang Bago las tres sang hapon sini nga Lunes, Agosto 15.
Ginkilala ang suspetsado nga si Jeffrey Daniel Romualdez, alyas “Hitler”, 40-anyos, wala sang trabaho, residente sang Purok Balinghoy sa nasambit nga barangay, kag bag-o lamang nakaguwa sa prisohan sa kaso nga murder.
Nakumpiskar sa suspek ang 13 ka sachets ukon mga pakete sang ginasuspetsahan shabu nga nagabug-at sang apat ka gramos kag nagabalor sang P27,200, tooter, lighter, kag iban pa nga kagamitan.
Gin-aku pa sang suspek nga may mga tion nga gindugmok nga Snow Bear ang iya ginabaligya sa iya mga customer.
Dugang pa sang suspek, mas mahapos ang pagpangita sang kuwarta pinaagi sa pagbaligya sang droga kag indi sini luyag mangabudlay bangud bag-o lamang ini na-operahan matapos nabun-an sa syudad sang Bacolod.
Magabalik sa prisohan ang suspek nga nagapang-atubang sang mga kaso sa paglapas sa sections 5, 11, kag 12 sang R.A. 9165 ukon Comprehensive Dangerous Drugs Act of 2002.
