BACOLOD CITY – Ginakabig top 1 most wanted person sang Bacolod Police Station 3 ang gin-aresto sa Purok Langis, Barangay Banago sa syudad sang Bacolod, takna las 6 sini nga gab-i, Martes, Setyembre 6, 2022.
Ginkilala ang akusado kay Ramos Trabucon, 30-anyos, wala sang obra, kag residente sang nasambit nga barangay, suno sa report sang Bacolod City Police Office.
Wanted sa kaso nga murder si Trabucon.
Bitbit ang arrest warrant nga gin-isyu ni Judge Juvy Victoriano-Dioso, nagpadulong ang katapo sang City Intelligence Unit sang BCPO kag Station 3 sa ginahamtangan ni Trabucon.
Si Judge Victoriano-Dioso sang Regional Trial Court, Branch 49 ang wala sang bailbond nga ginrekomendar para sa temporaryo nga kahilwayan ni Trabucon.
Suno sa BCPO, ginkasuhan si Trabucon bangud sang pagpatay kay Bryan Garrido sadtong Hulyo 17, 2022 sa Purok Langis.
Nakahunong karon sa Station 3 si Trabucon.*
