SILAY CITY – Ginkumpirmar sa Radyo Bandera Bacolod ni P/Lt. Col. Mark Anthony Darroca, hepe sang Silay City Police Station nga napasakaan na sang kaso subong nga adlaw, Miyerkules, Setyembre 21, ang tricycle driver nga nagbuno sa iya kapareho nga driver gamit ang bulang.
Nagapangatubang sang kaso nga frustrated murder ang suspek nga si Randy Obaldo, 46-anyos, may asawa, residente sang Purok Sunshine, Barangay E. Lopez, siyudad sang Silay, Negros Occidental.
Samtang ang biktima nga si Noli Dusaban ang naga edad sang 47 anyos, may asawa kag residente sa kapareho nga lugar.
Suno kay Darroca, kaso nga “Frustrated Homicide” ang una nila nga ginpasaka batok kay Obaldo apang gin-upgrade ini sa “Frustrated Murder” pag-abot sa Prosecutor’s Office.
Sandig sa imbestigasyon sang Silay Police Station, nagluntad ang insidente takna las 4:50 sang hapon, Martes, Setyembre 20, sa Brgy. E. Lopez.
Suno kay Darroca antis ang natabo nga pagpangbuno, may nagluntad nga mainit nga argumento sa tunga sang suspek kag biktima samtang nagtambong ang mga ini sa pagsinapol sang ila Tricycle Association sa Barangay E. Lopez.
Dugang pa ni Darroca sang magkilit-anay liwat ang duha, ginsinggitan sang suspek ang biktima sang mga tinaga nga “Ano tulok mo?”
Nagpanaog naman ang biktima sa iya tricycle kag nagbalos man singgit dala pamangkot sang “Ngaa ginsinggitan mo ko?”
Didto na ginlamposan sang suspek ang biktima gamit ang tubo apang wala ini makaigo.
Nagbalos naman ang biktima pagbunal sa suspek gamit man ang tubo kag naigo ang suspek sa iya nawala nga li-og.
Nakatiyempo naman ang suspek nga magabot ang bulang sa iya nga paha kag ginbuno ang biktima.
Nakaangkon sang tatlo ka igo ang biktima – isa sa natuo nga kilid malapit sa dughan, isa sa natuo nga kamot kag isa sa nawala nga butkon.
Ginhingagaw naman dala si Dusaban sa Dr. Pablo O. Torre Memorial Hospital sa siyudad sang Bacolod kag yara na ini subong sa istable nga kondisyon.*
