SILAY CITY – Gindakop ang isa ka tricyle driver matapos makuhaan pito ka gramos sang ginasuspetsuhan shabu sa ginpatigayon nga buy-bust operation sa Elena Subdivision, Brgy. 5, siudad sang Silay.
Ginkilala ang drayber sa kay Roy Piedad, 40-anyos, may asawa, tricycle driver, residente sang Sitio Barra Paghidaet, Brgy. Mambulac sa nasambit nga siudad, kag ginakabig nga street-level individual (SLI) sang kapulisan.
Base sa report sang Silay City Police Station, nakumpiskar sa drayber ang siyam ka sachets sang ginasuspetsuhan shabu nga ginabulubanta nagabug-at sang pito ka gramos kag nagabalor sang P47,600 sa ginpatigayon nga operasyon takna las-4:46 sang hapon kahapon sang Huwebes, March 30.
Yara na ang drayber sa kustodiya sang nasambit nga police station kag pagapasakaan ini sang kaso sa paglapas sa Republic Act 9165 ukon ang “Comprehensive Dangerous Drugs Act.”
