Nagsumiter na sang itsura sang vaccination card nga may Q.R. code ang Management Information Technology Computer Services (MITCS) sang syudad sang Bacolod.
Ini ang ginkumpirmar ni Doctor Chris Sorongon, deputy for medical data and analysis sang Bacolod may angut sa status sang vaccination card sang syudad.
Ginahulat nalang suno kay Sorongon ang approval ni Mayor Bing Leonardia sa mangin itsura sang bag-o nga vaccination card.
Kun madumduman nga isa ang Hong Kong sa mga pungsod sa gwa sang Pilipinas nga nagpahayag nga indi ini magbaton sang vaccination card halin sa pungsod Pilipinas.
Bangud diri ginatingwaan sang syudad nga maplastar sang maayo ang vaccination card nga may Q.R Code agud malayo ini sa posibilidad nga mapeke.
Apisar sang mga bag-o nga variants sang COVID-19 nga na rekord sa syudad, gina seguro sang mga health officials nga padayon sa gihapon ang pagdamu sa mga Bacolodnons nga nabakunahan na sang COVID-19 vaccine.
Sa karon 30 tubtob 40 porsyento na sang populasyon san Bacolod ang nabakunahan sang COVID-19 vaccine.*
