Agud malikawan ang “anxiety” sa patigayunon nga vaccination sa mga naga edad 5-11 anyos, luyag sang Emergency Operations Center sang Bacolod nga himuon nga kaangay sang isa ka Children’s Party ang vaccination sites para sa mga kabataan sang syudad.
Suno sa pahayag ni Doctor Edwin Miraflor, officer-in-charge sang Bacolod City Health Office, nagaplano ang EOC Bacolod nga sa kilala nga mga fastfood chains kaangay sang Jollibee kag McDonalds patigayunon ang nasambit nga vaccination drive.
Ginapanawagan man ni Miraflor ang partisipasyon sang mga nagatrabaho bilang mga “clowns” nga magpakigbahin bilang volunteer agud nga may magalingaw sa mga kabataan samtang nagapabakuna.
Paagi sa ini nga ideya, mabuligan ang mga kabataan kag mga ginikanan nga mangin mamag-an ang pagpabakuna sang COVID-19 vaccine.
Sa Pebrero 14, natalana ang pag-umpisa sang vaccination rollout sa mga naga edad 5-11 anyos.*
