Veteran Mentor Tim Cone, kabahin na sang Gilas Pilipinas coaching staff sa 2023 FIBA World Cup

Magabalik na sa serbisyo sa national team si veteran mentor Tim Cone sang Barangay Ginebra agud mangin kabahin sang Gilas Pilipinas coaching staff para sa 2023 FIBA World Cup.

Ini ang ginpahayag ni Gilas head coach kag program director Chot Reyes sa bag-o nga national team development nga mangin simbolo man sang ila reunion ni Cone.

Nangin kabahin si Reyes sang staff ni Cone sa Philippine Centennial Team nga nagdaug sang bronze medal sa 1998 Asian Games sa Bangkok, Thailand.

Maga-updanay liwat ang duwa sa Gilas kaupod sanday coaches Nenad Vicinic, Jong Uichioco, Goldwin Monteverde sang UAAP champion UP kag Joseh Reyes para sa misyon nga ma-handa ang pinakabaskog nga Philippine Team.