Wednesday, July 24, 2024

YARA NA SA KUSTODIYA SANG KAPULISAN ANG ISA SA MGA SUSPETSADO SA NAGLUNTAD NGA PAGPANGLUTHANG SA SYUDAD SANG VICTORIAS

- Advertisement -

Yara na karon sa kustodiya sang Victorias City Police Station ang isa sa ginatudlo nga suspetsado sa nagluntad nga pagpangluthang kag nagresulta sa kamatayon sang duha ka mga persona sa Hacienda Basa 2, Brgy. 10 sa Victorias sang tinalikdan nga Sabado sang gab-i, Mayo 29, kag pagkapilas sang isa ka menor de edad.

Ang duha ka mga biktima ang ginkilala nga sanday Regie Loquinario kag Jony Solatorio Lunsay 34-anyos ang pang-edaron kag residente sang nasambit nga lugar.

Samtang nagsungka naman sa kapulisan ang isa sa ginakabig suspetsado nga si Dexter Manapo, 40-anyos ang pang-edaron kag gina tudlo sang mga nakasaksi nga isa sa nagpalupok sa nagluntad nga kinagamo.

- Advertisement -

Suno kay Lt. Col. Eduardo Corpuz, hepe sang Victorias Police Station nga ila pa karon ginapadalman ang nasambit nga kaso bangud naga guwa sa imbestigasyon nga away sang duha ka pamilya ang natabo kag indi magnubo sa tatlo ang mga responsable sa pagpangluthang.

Dugang pa ni Corpuz nga may na rekober pa nga homemade shotgun ukon sulpak sa bangkay ni Solatorio kag ila pa sa karon ginatinghuwaan nga marekober ang iban pa nga mga armas nga gingamit sang magtimbang nga pamilya Solatorio kag Manapo.

Ginsiling man ni Corpuz nga posible na salabat lang si Regie Loquinario sang ini ang nagtuyo nga mag tambag sa kinagamo sang duha ka pamilya.

Ginalantaw man sang kapulisan ang anggulo nga dumot sa magtimbang nga pamilya, kaangtanan sa trabaho, kag natabuan nga naka inom ang mga imbolbado sa krimen.

Porsigido naman nga magpasaka sang kaso ang iloy ni Regie nga si Haydee Loquinario batok sa mag-amay nga Solatorio bangud suno sa ila, ang pamilya Solatorio ang naga sugod sang kinagamo kag nagpangluthang.

Apang ginpanginwala naman sang padre de pamilya sang mga Solatorio nga si Juanito nga sila ang nagpangluthang kag ginatudlo sini si Manapo nga nagaisahanon nga nagpaniro nga nagresulta sa pagkapatay sang iya bata nga si Jony kag ni Regio Loquinario.

Padayon naman mga ginapanginwala ni Regie Manapo nga siya ang nagpaniro kag suno naman diri, ang pamilya Solatorio ang nagsulong kag nag tuga sang kinagamo.

Ginapabakod pa man sang kapulisan ang kaso batok sa iya base sa mga ebidensiya sa crime scene kag testimoniya sang mga witnesses. Padayon naman karon nga ginabulong sa hospital ang isa pa ka bata ni Juanito nga menor de edad nga yara man natabuan kag nasalabat sa tinirohay kag gina tingwaan man nga makuhaan sang statement sang kapulisan agud mahatagan kasanagan ang krimen.*

- Advertisement -
Shiela G. Gelera
Shiela G. Gelera
Shiela G. Gelera is a Bacolod City/Negros Occidental-based journalist who has covered various beats since she started her media career in 2013 up to the present. She had worked with the oldest local daily newspaper in the Visayas before she hopped into the broadcast industry. Currently the news director of Radyo Bandera Sweet FM Bacolod. Aside from being with the local media outfit, she is also a news stringer for a national media network and a story contributor for a local news daily in Bacolod.

Related Articles

Leave a Reply

Stay Connected

33,995FansLike
9FollowersFollow
0SubscribersSubscribe
- Advertisement -

Latest Articles