BACOLOD CITY – Nagresulta sa pagkapatay sang duha ka mga soldado kag pagkasamad sang anum ka iban pa halin sa pwersa sang gobyerno ang nagapadayon nga engkwentro sa nabukid nga bahin sang Barangay Carabalan sa syudad sang Himamaylan, Negros Occidental sini nga Sabado, Oktubre 8, 2022.
Nahibaluan nga sumugod Oktubre 6, may yara na sang pagbayluhanay sang lupok sa tunga sang katapo sang mga soldado kag New People’s Army.
Ginsundan ini sang isa pa gid ka engkwentro sadtong Biyernes, Oktubre 7.
Nagapatigayon sang pursuit operation ang mga tropa sang 94th Infantry Battalion kag tigayon nga na-track ang mga nagapalagyo nga mga rebelde, kag ini ang nagresulta sa pagnilukpanay sa Sitio Cunalom, Barangay Carabalan.
“While the troops were manuevering to assault the identified enemy position, they were hit by enemy fires, close air support was employed to suppress the enemy fire and extricate the wounded troops,” suno sa press release sang 303rd Infantry Brigade.
Napwersa naman nga magpalagyo ang mga rebelde sang nagpadala sang close air support ang Philippine Army.
Ang walo ka pilason nga mga soldado ang gin-air lift kag gindala sa Dr. Pablo O. Torre Memorial Hospital. Apang ang duha sa ila ang ginbawian sang kabuhi.
Hungod nga wala ginpangalanan sang Army ang mga pilason kag napatay nga mga soldado.
