Nagsinggitan ang 20 anyos nga babaye matapos ini ginhurikap sang ginapatihan duwa ka hubog nga lalaki sa Sitio Batang, Barangay Talaban, ciudad sang Himamaylan sadtong Hunyo 4 alas 8:45 sang gab-e.
Ang suspek ginkilala kay Alvin Equibal y Vinson, 25 anyos, single kag isa ka menor de edad.
Base sa imbestigasyon sang Himamaylan PNP, nagasakay sa traysikol ang babaye upod ang iya classmate sang hinali nalang ginpaparahan sang ginapatihan duwa ka hubog nga lalaki ang ila ginasakyan.
Pagpondo sang traysikol, hinali nalang nila ginhurikap ang hita sang babaye nga nangin rason sang pagsinggitan sang babaye kag nagpangayo sang bulig.Gilayon man nga nagbulig ang mga tambay sa area kag ginpunggan nga makapalagyo ang mga suspetsado.
Sang nag-abot ang mga kapulisan kag nagpatigayon sang “bodily searched” sa mga suspetsado, nakumpiskar kay Alvin ang isa ka unit sang .357 SW magnum revolver nga wala sang serial number samtang nakuha man sa menor de edad ang isa ka unit sang .22 caliber magnum nga wala man sang serial number.
Ang mga suspetsado ang yara sa kustodiya sang Himamaylan City Police Station para sa nagakaigo nga disposisyon.
