METRO MANILA – Ginatun-an na sang Department of Health (DOH) ang 23 nga bakuna batuk sa dengue nga yara sa emergency medicine list sang World Health Organization (WHO) angot sa padayon nga pagsaka sang kaso sang impeksyon sang dengue sa bug-os nga pungsod.
Suno kay Maria Rosario Vergiere, Health officer-in-charge nagakolekta na ang ila departamento sang ebidensya kag ginatun-an na nila ang nasambit nga bakuna agud makahatag sila sang rekomendasyon sa Presidente nga ipatuman ang pagpanagtag sang posible nga bakuna batuk sa dengue.
Wala man siya naghatag sang pahayag kun kaupod diri ang kontrobersyal nga Dengvaxia nga ginaduso sang pila ka health sector.
Madumduman nga ginsiling ni Vergeire nga kaupod ang Dengvaxia nga ikonsiderar nila bilang bakuna apang kinahanglan pa ini mapaidalum sa maid-id nga pagtuon antes nga ipanagtag ini sa publiko.
Nagdangat naman sa 64,797 ang kaso sang dengue nga narecord humalin Enero 1 tubtob Hulyo 25, mas mataas ini sang 90 porsyento kumparar sa narecord nga 34,074 nga kaso sang pareho nga petsa sadtong tuig 2021.
