Ginhingadlan sang National Kidney and Transplant Institute ang tatlo ka tuig nga bata, bilang pinakabata nga “organ donor” sa Pilipinas.
Kalakip sa mga gin donate ni Ezra Rosario amo ang iya mata kag kidneys.
Isa ka 24 anyos nga indibidwal ang magabaton sang kidneys ni Ezra samtang pito naman ka persona ang magabenepisyo sang iya mga cornea okon mata.
Nabawian sang kabuhi si Ezra matapos ini nga malumos sa swimming pool sang magbakasyon ang iya pamilya sa Pilipinas.
Nagapuyo sa Washington sa America ang pamilya ni Ezra kag nagbakasyon lamang sa pungsod kaupod ang iya nga ginikanan nga sanday Jennae kag Julius Rosario.
Kaupod man nga nagbakasyon ni Ezra sa Pilipinas ang iya kapid nga lalaki.
Nag selebrar sang iya kaadlawan ang kapid sang Nobyembre 6 sa Paoay, Illocos Norte.
Suno sa iloy nga si Jennae, naglumpat si Ezra sa swimming pool nga may kadalumon nga 5 ka tapak, imbis nga sa kiddie pool.
Gindala sa ospital ang bata, apang wala sang nagakaigo nga equipment ang pasilidad gani gindala pa ang bata sa Metro Manila sakay sa eroplano.
Matapos ang apat ka adlaw nga pagtatap sa bata, gindeklarar ini sang mga doktor bilang “brain dead”.
Gindesisyonan na lamang sang mga ginikanan nga papahuwayon ang bata.
Nangin malip-ot man ang kabuhi ni Ezra apang ang iya kamatayon naghatag sang malawig nga kabuhi sa iban nga tawo.*
