Mas mataas sang halos tatlo ka pilo ang kadamuon sang kaso sang cholera sini nga tuig, kumparar sang tuig 2021.
Base sa datus nga gin release sang Department of Health (DOH), may yara lamang sang 976 ka mga persona nga nagpositibo sa cholera sa bilog nga Pilipinas humalin sang Enero tubtub Oktubre tuig 2021.
Sini nga tuig 2022, naglab-ot na sa 3,729 ang kadamuon sang cholera cases sa pungsod.
Kalakip sa mga lugar nga may madamu nga kaso sang Cholera amo ang Eastern Visayas, Davao Region kag Caraga Region.
May madamu man nga kaso sang cholera sa Central Luzon, Western Visayas kag Eastern Visayas.
Sini nga tuig, na record man ang pagkalamatay sang 33 ka mga persona bangud sang cholera.
Sa bulan sang Hulyo, tatlo ang nagkalamatay bangud sang nasambit nga balatian, siyam naman ang nagkalamatay sang Agosto kag duha sang Setyembre.
Kalabanan sa mga naapektuhan sang cholera amo ang mga kabataan nga naga edad sang lima tubtub siyam ka tuig.
Apisar sang madamu nga kaso sang cholera sa pungsod, wala pa sang LGU okon Local Government Units nga nag deklarar sang outbreak.
Ang cholera isa ka balatian nga tuga sang bacteria nga mahimo makuha sa kontaminado nga tubig.
Kalakip sa mga sintoma sini amo ang diarrhea kag pagsuka nga mahimo magresulta sa pagka ubos sang tubig sa lawas okon dehydration.
