Tragic mishap.
Halin sa Binalbagan Infirmary ang mag-asawa nga sanday Riza Mae Clair Gantes, 23-anyos kag bana sini nga si Jose Jingo Gantes, 32-anyos para sa check-up sang ila bata nga si Krisha Faith Gantes, 7 ka bulan ang edad.
Apang, makasilidni nga desgrasya ang nasumalang sang ila pamilya sa barangay road sang Sitio Pukatod, Barangay Payao sa banwa sang Binalbagan, Negros Occidental, takna la 1:30 kaina sang hapon, Martes, Nobyembre 29, 2022.
Pagpauli na kuntani sa Barangay Bi-ao sa Binalbagan ang pamilya Gantes sakay sang Honda TMX 155 nga motorsiklo nga ginamaneho ni Jose, samtang back-rider ang iya mag-iloy, sang nagtuyo ini nga ma-overtake sa ISUZU dump truck nga may plate numbe USB-629.
Apang, nabungguan sang motorsiklo sang pamilya Gantes ang pedestrian nga ginkilala kay Annabelle Geocada, 48-anyos, residente sang Brgy. Payao, nga nagalakat sa nawala nga bahin sang dalan.
Populated ang nasambit nga lugar gani madamo sang nagatabok kag nagalinakat sa dalan.
Nadulaan sang control sa motorsiklo si Jose, nagliko ini patuo kag natumba sa dalan, rason nga nagtabog ang 7 ka bulan nga bata kag nalapakan ini sang dump truck.
Wala makapreno ang dump truck nga may karga nga balas kag nalapakan gid sang pang-unahan nga guma sini ang ulo sang bata. Nadunot kag naggwa ang utok sang bata sa tuman ka bug-at sang truck nga nakalapak sa iya.
Dyutayan man nga malapakan ang ulo sang iloy nga malapit naman sa guma sang truck apang nakaluwas.
Nakaangkon sang injuries ang iloy nga si Riza Mae Clair kag ang pedestrian nga si Annabelle.
Gindala naman sa Binalbagan Police Station si Jose kag ang drayber sang truck nga si Noel Pabores, 38-anyos, residente sang Barangay Camalandaan sa banwa sang Cauayan, Negros Occidental.*
